Of Lígang,life,memoir and time:Poetry for spring

          Mg. Abhijit Pa:yengké Mé:tom Engoko-

Ri:bi gaséng gapa gale gémap okop sumkan....Photo:Khirud Kutum

KAPÉ MITPANPÉ

(Dítag 2007 Agom longé mí tosagna)

Kapé mitpanpé Khaboli Pomuha

Kapé mitpanpé nom

Kapé mitpanpé

Mibu galuk, Gonro ugan gége:na

Yakan ege, Ribi gaséng gége:na

Ya:me mímbírké

Oi - ni:tom gognamém

Mé:tom tomka:mínsunamém

Luker kerka:mínsunamém

Tigsan lunamém.

Yumdéng ayirdo

Nogjin, Po:ro, Apo: lédulo

Kudubali, Tímbel pa:ta:lok

Bedolo, Karmi, Kinggong ongo bhaji

Pétu ra:sor donamém.

Kapé mitpanpé

Minom uríksuko

Rojaba:ri Em. I. iskullo

Yégtag donamém

Aro asin - ayangki

Du:po:to - dagpo:to

Dopo - típoto émnamém.

Kapé mitpanpé ngo

Kapé mitpanpé

Khaboli pamuha nom …..

Ronganoi gítup khaboli pomuha

Yirpo so:po:l du:nang

Ranganadi Bangké Agom Kébangé

Pesuto silo

Nogging ko:lok

Agerém gerrobyé

Nogging ko:lok

Dakorém korrobyé.

Kapé mitpanpé ngo

Kapé mitpanpé

Kaboli pamuha nom …..

ÉDÉ ADÍDO, ÉDÉ LONGÉDO

Édé adído, Édé longédo

Putabil do:lu: rísondo

Eranoi pa:ta:dé dungngai

So:bo rakidodok

Sulli apin momanna

Pétukari tumanko

Asi toko pígodé

Mongkukuliya do:lu:  rísondo

Géjing sapori:dé dungngai.

Édé adído, Édé longédo

Doloni pasum jogsotge:n

Kurrad yemíloi

Gota Kinggo, Karmi

Magur, Bayag, Límar, Lígad

Germe:, Pempe:la lang

Létung ongoém pa:dungai

Jongkap do:lu: Dampoli  arígdo

Kundu do:lu:

Rongapathar arígdo

Mothowkhur kangkong

Gelaha:ti nol gagorido.

Édé adído, Édé longédo

Pabho sí:lu:do

Peyi - pettangé

Tatpopé kabdungai

So:bo menjeg rakiné

Po:yub okumdo

Oi - gogna

Tekeli dumdum dí:dungai

Tu:tog tapung muddungai

Édé adído, Édé longédo.

KÉBANGKO  BA:PÉ  IDUNG

Bojeko ika:bo

Sé Mo:dí:so

Kébangko ba:ma:nammé …..

Kébangko ba:ma:nammé …..

Se:ko kapé ungkoko me:du:ji

Se:ko kapé ungkoko modu:ji

Lunama:pé idung.

Tani:lok me:nggodé:sin

Anguyonna gídung

Ménggodé ….

Ka:to - ka:toném

Réngamsém pan - pan - panran

Moyenémpé idung

Ngok asinbo pésoko a:dung

Kapé iya:né ……

Sémpéi pan - pan - panranna

Kéyudsumoyen

Amik tubíso

Agom Dírbí - dírlabém.

Ngok asiné sagsa:dung

Ma, takamé gípumsuna

Kébangko ba:pé idung.

Kaje kaje

Kinsun takama

Méngkitsun takama

Gípumsupo:nai ….

Kébangko ba:po:nai …..

Aturné adíso

Kébangko ba:pé idung

Tarungko ru:pé idung.

RONGNGAM PÉSAMÉ

Lolad - ladné yumédo

Karé tunggédo

Ya:yo bí

Su:sin kíbidonéi

Épop míjíng lang

Jugi - Jumatké

Age: do:yingém.

Sujala, Suphola lang

Bishwa bí

Do:ying tattí:doi

Yupní:yupyap - lígsuna

Dokké

Dokké kapikan émna

Su:sin tattí - donéi….

Yo:yora:do

Bísol - bíyolpé

Nan bí boa dokunéi

Ipko pejo:pé.

Su bulu

Iskullo gíka:bo

T V lo

Cartoon serialém

Togabna kangka:bo.

Ya:yo bí:sin

Aipé éjoka:bo

Age: do:ying kíbiko

Age: do:ying tatko

Kare tungéngé

Rongngampésamé.

NGE:SURRA  KA:TONÉM

Ngok okum ruyik lambéki

Gítína gídung

Se:kai gariki

Se:kai motor saikelki

Se:kai saikelki

Se:kai ale:ki

Gítína gídung

Nge:surra ka:toném.

Se:kosinéi

Se:komsin

Bérkutsun ka:mo:ma.

Nge:surra

Ka:yarra ka:toném

Ka:pí - ka:so:do:na

Te:te:re:pé saki dorko

Kangkur ka:re:né okumdo

   Apo: potikangé

Sornampé sorgo:dung.

Mé:mid na:ma:na

                                  Mé:mí sagmí:na

Nge:surra

Ka:toném lékoda

Gítína gídung akoné

Akoném donam - tí:namo:do

Abu:bu:na dung.

                                                                                               Mitomké Dungko

Gorakh Pandey Boys Hostel, MGAHV, Post. Manas Mandir

Gandhi Hills, Wardha-442005 (Maharashtra)

E-mail: abhijit_payeng@yahoo.co.in, apayeng@gmail.com

Cell: 08805297680, 09049141320

Mitom Bhaigeswar Pogag Ké Mé:tom Ba:piko

Appun alég do nouwé dénga:lang po:pírpé....Photo:Rumi Pegu

APPUN ÉTOR

       Appun étordé yage-geyumdung

Appunné pun-yemílo,

Ngok sí:sang asinso mé:po a:dung

Nok ayang pa:yemílo.

Ginnmur ésaré sara: biyemílo

Nok sí:sang ayangém

Rébég rébékpé miksi dílídak

Mé:pa:yem nok ayangém.

Bírduk ésaré sarkub sarrabla

Nok ayangém sara:bidung,

Ko:u bí:sin ko:u ko:u émla

Ngom kaptadbidung.

Ma:yi: bo:sin ma:pa:dung nom

Mé:nyok ma:pé ngo,

Nok amír étordé ka:po kangané

Dumsik migmodém léngkantoi no.

Appun étordok punné appunpé

Aipé pun-yumdak no

Ngok asin  étorbok

punné appuné no

Aipé mé:dak ngo 

TURNAM

Tani: turnamsi duyarmang

Mépakla gíkupé lagiye longéko

Sé i: adín kané amírsém.

Lé:pakpé lagiye sé amo:so

Né:ng-ommangém bíro-bírmém.

Sé tani: turnamsé

Enge annélok kergo:né

Pumpuluk assé.

Kérretmílloi yokpakye

Tulang kamané  sakiémpé

Lop  émna mitpakye.

Mé:ngkítok mi: takmi:é

Gídagém íngkoko bomtunga:n?

Bommanggom arjito bojeko

Ao: ommangém, aín murkongém.

Takamdé sékké légapé?

Pítsula gítungai alag éngngéra:pé

Édémí:pé gíkupé lagiye

Tani: gí:da:ngém mépakla.

Tani: dungko sé bomongsé

Lo:nyi:ongko yírmankowé

Tani: émsula du:mankowé.

Odokké

Gíkupéi lagiye takamém mégela

Kíbi sukupé lagiye

Pa:b punyo  gernamém

Tayé:to du:né sédí ba:bu:kélo.

No dugdaggom dukpí sumaye

Kabdaggom kappísumaye

Yenggabla bomyeku

Bumbo na:néké barígé.

Bumbo na:néké barígé

Nok aidém bomro:dokuém

Kaptak ri:takla du:ye

Ope olungé,ao: ommangé

Émdaggom no kinsukumaye

Ma:nying amo:ngéisong

Dong amo:ngéisong

Lé:pakpé lagiye sé amo:so

Né:ng-ommangém bíro-bírmém.

 NA:N
                              

Aya:lok ga:né na:nké a:pí:lo

Mé:polok dité

Asé:lok aín okumé.

Aya:l jarnamdé

Na:néké  aíké mosunam to:gé

Angkédok pomsiri sunnamdé

Na:néké ayang ormané.

Na:némé mé:nyoksunamdé

Longélok lo:tu:ngé

Na:nébí kamamílo

Mo:písok pí:ra:mé.

NGOLU SÍ:SANGÉ

Ngolu sí:sang émépé dorsa:péné

Ngolu sí:sangé opín turbopéné

Bharo:t amo:sok mé:pone lé:tomdém

Ngoluí:ng turyarmopéné

Ngoluí:ng turyarmopéné.

Do:nyi sangga amongé

Sé ngoluké Bharo:t amo:sé,

So dung

Mising –Bodo,Karbi-Rabha

Ahom –sunuwal,Tiwa-Dimasa

Moran-Motok Deori-Sutiya

Noga-kasi-joyontia kuj-kosari

Mizo-Tirpuri lusai-Monipuri

Miju-Mishmi Adi-Apataniyé,

Ngolu Bharo:t amo:sokké

Biro-bírmangngé.

Lohit Siyang Subonsiri

Dikow Dihing Ujai Dhonsiri

Ngoluké a:né abungé.

Hindu-Musolman Sikh-Kristan

Join-Buddho émmapé

Léko lakkopé ngolu sí:sangé

Bharo:t amo:sim kangírbopéné

Mitom Bhaskor Pe:guké ako

Urrob bilang ngom ginmur ayé ku:mílo...Photo:Rumi Pegu

                                  Líga:so Nom Ríksurungkupé

Ginmur a:dung émnamdém no:sin kindu:pé

Dum dum-lu:pi bé:mang gom,lo:le dabo lo:le momanggom

Ésar ansípé bo:bilo:lipé písí-pa:sapé émno du:pé

Singgi gimuré nok arai né dumíd dém ukkí bidu:pé

Péyyi-péttangé rokompé nom urrob bidu:pé

Líga:so  nom ríksurungkupé

Asin ara:sok kunnam do:yingko kunge:kupé

Charikoria ané rago do tetbokge:la

Do:nyi oang ayir do

Kímín sulapé mé:po-mé:dír agomko

Ma,ma...mé:nam do:yingo mang!

Do:lu simong turnam-ga:nam ko:sin

Sékké aríkdém pu:mi assé moyutton!

Odokkésin kílapé sé:kobí sékkép ikan!

Ayir pa:mílo Ta:to ké pa:ta doksin ongo ma:lapé

Rago ru:yik pétu arík dém ka:téla

Alo-mírsí ko bomna tiné-ku:né ka:la apí-a:ye ko  dolapé

Yumdéng ayir do lenbomna gílapé

Lígang so:man mankolo

Édé ka:po-kanggan né ané ru:yi do:ludo

Gumrag so:manko mo:la

Réngam dírbí turyar molapé

Líga:so  nom ríksurungkupé

MENSA:RUNG LANG SUMNYO KÉ DO:YING

 Leke:lo sumnyo dornyi: ko koje pa:ta ru:yido dungngai.Binyi: apta atí légapé mé:pénamé kamangai.Simín-sirrém pa:ram mangngai.Édémpila bínyi: koje pa:tangém mépakla okolopésin gímangai.Bínyi:kké ame: ame:né ao: dornyikosin dungngai.Ao: kídardé aíé símín matasula dokin mangngada.Édémpila abodé apta gímílo anédé ao: kídardém ka:si: dungngai.

Édé pa:tang kérangké bogum sí:ludo Mensarung adorkosin dungngai.Édé mensaru:dé aipé tengor kanékai.Bikké ao: ommang okkosin kamangai.Bik aíké aki:dok légapé ami ké doruk dopugo:ngngém magola yedungai.

Longékolo mensaru:dé anínké tani: do:lungkolo dopuk dongadém dogongkapé gíla yaggola du:dom tani: íra:dok yuppakla lé:nam bedné du:n kolo pítkepsuto.Du:ndé bíkké línggu:do kíp-kappé pítkepkang.Kapésin pítyuk-sula:tokumang. Apta atíé du:ndok aduddém tadbegmílloi dupagdakku.Odokké do:lu:lo:gom du:ndok bé:namém tadbekmílloi amme: méndak.Édémpila donam tí:nam pangku:ma:la longngém longépé sanpé sana:bomkang.

Longkolo abo sumnyodé aptapé gikang.Édé agomdém mensaru:dé kinna sumnyo anédo:pé gía:la lukang-“Éi,sumny né:ng,nokké milbongé okolopé gíkan? no kindon, nokké milbongé sé ngokké du:nsokki du:nko murkongém nartung.Lomna biyem bigortéiku.Ékéma:mílo nok sé ao: anyi:sok adorko bikupé lagiye.Déma:mílo agomé aimaye.Kindon?Sé koje pa:tasokké nolu gípakkupé lagiye.Sé ngokké ta:to yo:yoké kojebé:dam amo:ngé.So ngokké agomo:lok yeladak.”Mensaru:dok agomdém talla sumnyo ané péso kokki yessé len-go:sukang.Bí ao: kídardok légapé pésoki lukang-“Migoma,atí atídém man-goyobongka. Sé dumsung adín asutko du:ng sém bomna gípongkakubong.Bí gíangkumílo agomdém lumínsulangkupébong.”Édémpé lugelam sumnyo anédé Dumsung adín asutko bitoku.Odo Mensaru:dé aipé aséla bomna gíkangku.Édémípé bí lo:dípé sumnyo anédém morítla adíném bomdakku.

Longékolo do:ying appídém sumnyo abo dém lubitoku.Odo édé longédo sumnyo abo dé séuko ito.Ané sumnyodém ayat yaddopé luto odokké bí sumken kolo aso:pé lé:sila dungkang.Angu longé kídardémpé édé longédo:sin Mensaru:dé morít mokela gía dungngai.Odo Sumnyo abo dé gampé émna sumgaptagai.Mensaru:dé daddo:pé sumpítsuto.Sumnyo abo dé mensaru:dém ménbomkang.Ménbomna gídolo ké:né amíngko ge:setsula dungngai.Édé ké:né amídok porkebdokki Mensaru:dé déngkolola gíkang.Sumnyo abo dé sumkepsula dungkang.Mensaru:dé bérkutsula ka:namé sumnyodé dugmínmang.Émpila gílatsula ka:ngkapé gílattoku.Ka:namé ké:né amído pítkepsula dag.Taying kídardé uying émna dé:pansukang.Édém tatla ya,émna pésoki mensaru:dé lomgésula bérkutsumapé dukkang.Asutko duggela gílatsula ka:namé sila dag.Odo Mensaru:dé asin bottapé mosula Sumnyo anédo:pé gíla lukang-“Éi ,sumnyo né:ng,nokké milbongém ngo ké:né amíngélé oksilge:la paksa:la métak.Ayatpé mé:dakmílo gíla ka:toka.Supak no ngokké né:pé gíyén gíma:n?lutok.Ékémamílo ador adorpé nok ao: dornyi: sém mokeyamye.”Sumnyo anédé ao: dornyi:dok légapé Mensaru:dok lukam lukampéi tatto.Mensaru:dé sumnyo né:dém morít moke:la migomémpé okumo:do du:la dodag.Sumnyo anédé apta gíla dobodag.

Longékolo sumnyo anédé lukang-“Éi,sé si:lu:sé apta atíé kakuma:pé idung.Ngolu angu sí:lu:pé gípé lagiye.”Édémdémpé lula Sumnyo anédé sí:lu:ng angukolo:pé gíboto.Lamtédo bottan asi korongko pa:la ba:ngkopé ito.Odo Sumnyo anédé ao: anyi:dém gordungdo jo:líksuge:la a:né:dém ba:ngkoto.Odokké Mensaru:dé asi siyaddo ji:bu:rutkang.Ngakí ngakíla asi bojeko tí:la ba:butsukang.Odo Sumnyo anédé ao: dornyi:dém tayo:do mégela Mensaru:dém soríksutoku.Témpído mensaru:dé botta bottapé jé:la lukang-“no kapila ngom sosangkaku:n?ngo asisé íddíko o:rí:dakson émnamín síngka:dunga:n.”Édémpé lugela tang émdopé Sumnyo anédém pipaklíkto.Aipé morítmoke  daggom Sumnyo anédé ao:kídardok légapé Mensaru:dé kapéi luyeji édémpéi talla yebosula dungkang.

Longékolo appípagdé lékopé kiruk rugbosukapé gíto.Mensaru:dém símín ménnígdopé mílíkto. Símín kídardé mensaru:dém  péssoika:mang.Édémpila Mensaru:dém símín togabdopé mílíkto. Odokké ao: ané kídardé símín kídardém mén-yet mén-yella ménlíkto. Mensaru:dé yenggappé émna símín adorko sumgapto.Símíndé mensaru:dok aki:dém baddanna batsurlíkto.Odo Mensaru:dé aki: gomgapsula sia:la dungkang.Sumnyo anédé tauto-“kapila símíném adorkosin gamtoma:n?”odo Mensarudé lukang-“ame ame:ya:uné símín kídardém ka:la yirkolok ngok aki:ém yirsursuto.Odo sumnyo anédé:lang ao: kídardé lékola angupé kirugém rukla Dumsung adorko pa:to.Édém bulu orsula doto.

Édé bogum sí:lu:do bojeko Mensaru:ngé dungngai.Yumé ayirém Mensaru:ng kídídé lo:dípé utak uyaksudag.Édém Mensaru:dé talla yumé ayirdé lo:dípé lé:si:la umín kapé gídak.

Longé gítíkang.Sumnyo ao: dornyi:dégom botta:usangkabong.Bínyi:sin aíké yelam kumli:ém kinsusangka:bong.Ngoluké ba:bu bí yumdípé yumrang ara:ngo:lo okkom ikapé gídon émna anédém tauto.Anédé odo atímang,Sisi mokapé gídag émna lubidag.Ao: anyi:dé anédok agom dém aropé mé:ma:la bínyi: abudok me:lam me:lamdo rubbomkang.Yuméko:lo ka:namé Mensaru:ng asumdo gía:mínna uke uye émna umínnadung.Odo bulu kinto ngoluké abumang émna.Sé Mensaru:ngé.Odo anédém gia:langkula tautoku.Odo anédé lukang-“arro. Noluké abuém bí:íng moketo.Odo nolu ajja:udagai.Nolum o:sa:nam légapé ngo bíkké luko lukol talla nolum síddíko bottado:pé o:sa:to.Supak nolu botta:utoném ngokké asinsé aipé mé:po:dung.”Ané do:ying appí:dém kíkurra lungabbito.Anédok agom dém  talla aipé ao: anyi:dé aglíngkang.Odo dornyi:pagdé Mensaru:dém mokepé émna mén-go:bomkang odokké moketo.Édé longédokké anédé:lang ao: kídardé aséngo:pé dungkaku.

TO:DE: LANG PÍAG KÉ DO:YING.

                                                                                                    - Bhaigeswar Pogag

Do:yi:lok do:yingé.To:dí- yamo do:yingé.Lekelo Agro píakkolang To:de: péttang dornyi:ko dungngai.Kampo émyém To:de:émyang kamponé péttangé amo:so kamangng.Ka:nyingé émyem Píagémyang ka:nyi: péttangé kamang.

Édé do:yi:dé longkolo To:de:ké asindo mé:yar mé:yarra mé:la dungkang.

Longékolo To:de:bí mé:ngkang-amo:sok  bodo:ya:pé tame kané pétta-péyi:nglok ngokképak bodoya:dak.Gényi:ng gésongé.Sémpé bosor-boyorpé éddíko lo:dísém ngo sogobomna yeyya:n?Ngoggong sé amo:so  bosor-boyorné tame:sém jonggobomna dung.Sékai ngok Tame:sém koyyamílo bippai.Bí Pírrik asin mé:ngkampé mé:la mé:ngkesula siyyaboi.Émdaggom bí ungkokosin mé:beksutomang.

Longékolo bí édémpé mé:la du:dom Píakko ka:pa:suto.Odo bí mé:ngkang.Píagbímai aidu:n!bíkké tame:dé ko:tu:ngau:dak.Bégímpé dé:ladag.Amme:sin Píakmé rukmang.Ngok kangkanísi ngokké sinané.Ngom totnésin bojeko dung.

Píagbísin longékolo bím amme: lure:-luse:namém mé:re:sula aíé aipé mé:dírra asin asin bokki  lusukang-“amo:sok appíngéyang ka:nyi:ng ka:sodopé ru:nébísin ngom isimpé ru:pa:mangai. yakaloksin yakké ngomyang yaka-ya:né amo:so kamang.To:de:mé ru:néídé ngomsin ru:tak.Émpige:la ngonyim kapé ru:pansuto:n?”édémpé mé:la du:dom To:de:dé bíkké aníndo:pé dé:ngala gíato.Odo píagdé To:de:mé tauto-“Ajona nok Amíddok asuda:uko bisuyenéi?Nok tam:dém aipé mé:bo:dak.”Odo To:de dé aipé mé:pokang.Odo To:de:dé luto-“Ajona kapila bima:yen,biye.Nokké tame:dém ngom bi odokké ngokké tame:sim nom bipé.”odo Píagbí aipé mé:pokang.Odokké amíddém lang tame:dém bika:mínsuto.

Édémpé bínyi: dumsigém olaimínsuge:la asé:la segongbosukang.To:de:dé Píagdok dumsigém gébomnangkul bíkké réngam ara:dope gía:toku.Píagbísin édémí:pé gía:toku.Odo angu To:de: kídardé bím ajon jonsutokumang.Píagbímgom angu Píakkídardé padubla pato.To:de:mé:té angu To:de: kídardé padubla pato.Píagbí Píakpé itokumang odokké To:de:bísin To:de:pé itokumang.Bínyi:kké dumsígdé angpakkang.Bínyi:kké réngamé katokumang.Ajon-arumé katokumang.Bínyi: odopak mé:sukangku aidaggom aimanggom aíké opíndémyang aiyamang.

Odo bínyi: anyi:dé po:péké dumsigídéi aiyadag émna olaimínsutoku.Édé longédokké binyi:anyi:dé ami:ké gélod-bomlodém mé:botokumang.

ANDÉN DO:YING:SOBEN LOKKÉ TANIPÉ

-Mg.Bhaigeswar Pogag

Silokolokké takyíng  dítakpo:pé  Lokhimpur mongke:lo Taku do:lungko dungngai.Édé doLu:do Taruk émnam toku ami:ko dungngai.Bíkké ao:-ommang émpé sé:kosin kamangai.Ao-ommang émpé Soben adoro:ko dungngai.

Bí longékolo taonpé émna gito.Odo bédado aipé Iyong po:lodok pékarpé karné do:nyi dok gusi-gunamki ísíng néríngkolo tetrasupé émna Ké:né néríngkolo tetrasuto.Édé ísíng aníndo Iskulko dungngai.Édé iskuldok porainédé ko:-ko:néng kídardém poyirra dungngai.odo ko-ko:néng kídardé Sobennémpé tak-tagaila yirtaksula dungnga:lok poyir abudé aglí:la bulum jírto-é  Soben kídara okkom me:maitakla du:n?nolukémpiné Sobenné ngo íddíko tanipé motosong! Nolum tanipé mope émna ngo éddíko asin díkla porai du:song,noluk asin kídardé mé:ngkinmang.

Taruk bí poyir abudok do:ying appídém tomi:-tomi:la talla dungngai.Odo bí mé:to- ‘O, sé mastor simai ainékon! Bí bojeko  Sobenném tanipé motung émna ludak.Bí:mai ngok Sobenérém tanipé ilayen!’édémpé bí mé:la iskul sutidak me:lampé bí mastordok ukumdopé gia:la  mastordok alédo oala kumna lukang-‘Sara,ngokké amo:so okkosin kamang .Ao-ommang émpé Soben adorongko du:ng.Édém no tanipé mobitéika.Nom íddíko murkongém lagiyeji bipé.

Tarukké agomdém tadge:la mastordé aipé Tarukmé luyirkito,émdagom Tarukmé kapésin luyirla:tomang.Odo mastordé aiye ,ngo nok Sobendém tanipé molaye.Édémpigela ngom dítakko ayirém lagiye odokké murkong  200.00 ko(Língko annyiko) lagiye.

Taruk bí mastordok agomdém tadgela taléng-kítík kinsumapé aséngkang.Bí aséngki  lomna lomna okumpé gítoku odokké Sobendém mastordok ékumdopé sobomna bito.Bí murkong 200.00(Língko annyiko)kosin bito.Mastordé bím dítag me:lampé a:langkuka émna luto odokké Tarukmé urríktoku.Mastordé murkodokki take-talab régela Sobendém ayyompé dopakto.

Tarukbí longngém longngém dítak angordopé émna  saptíbomkang.Longékolo dítagé gíyinkang.Mastordok togésunam longédé píngangkangku.Taruk bí:si:n Mastordopé ali-aye,purang,Tépa-Tangetko bombila  bíkké aman ao dém langkupé émna gíto.

Tarukmé ka:pa:la mastordé péso péso:la  karíksuto. Tarugbí mastordém kumríksuto odokké tauto-‘Sara,ngok Sobendé tanipé ika:bonéi?’odo mastordé luto-‘Ilasin su bí Guwahati amo:bo  king-go migom okumdok bottané migompé iladu:ng.Odo Tarugbí aipé mé:pokang.Bík bombinam aman kídardém mastordém bigela Guwahatipé gito.Guwahatibo bí ga:ng odokké Ni:m annékké bomna gitung.Bí bottan migom okumkolo gíala ka:namé aropé bottané nammur go:goné amiko ka:pala giato.Odo amidé bím tauto-‘No sékom matala giadunga:n?’Odo Tarugbí luto-‘O,É,Sobena aíké malígémsin kangkinsukuman? Nomna gíríksukupé émna gídung.No tani dumsíggém pa:to émpigela Soben nammurdém su:lo:pé métung.Migomdé bím Sobenna émna lunamdém talla bí aipé aglí:la sokidardém lulíkla ager okumdokké ménnenlíktoku.Tarukbí odo aipé aglíla lukang-‘nom sé ga:ng sokki odokké sé Ni:m annésokki o:sa:tagai.Supak tanipé battokuném malígémsin kangkintokumang.Kasulang nom ngo mastordém lulíklangkula Sobenpé imoyeku.No ngom kapé mé:du:n?

            Édémpé togé géla Tarugbí mastordok okumpé gitoku.Odokké mastordém do:ying takamém kíbi:toku.Odo mastordé yampo rokompé murkong lingko annyikoda bomla gílangku émna okumpé urríktoku.Mastordé po:péké Sobendém dopakto émpila anupé Soben adorko régela mébito.

Rokondo Tarukbí aglíngki kortak takla mastordok okumdopé gito.Mastordé murko língko annyi dém latumgela Sobendém bitku.Odo Tarugbí Sobendém démna démna lukang-‘no ngom kapé mé:du:n?nom tanipé motoném botta bottapé mé:su:dagai,supak pa:du:n’ émna démbomkang.Odokké Sobendém dír dír émna ukumpé sobomkangku.