Longéko

---Bhaskor Pe:gu

Longéko gítungai

Nom kangkolo

Pakín nam ríbídém

Rínset sukolo

Noluk do:ludo:pé

Ajji-bottén koke-korong

Kongko:la pí:tungai

Do:lung tani tadla tadla

Nom ka:riksukolo

Noluk okum béda do

Ajon émna tautoném

Kamang émna tatpa:sula

Do:nyi oang ayir sik-mik do

Lí:né mingmo gébomla

Yumé yubko magongkaku

ANGU MO:PÍKO

---Juwel Pe:gu
 
Ngok asin mo:di:so
Arsa:moyé angu mo:píko

Mé:dír yémíl
Ígo: banggo:l kabgéngko
Mé:po yémíl
Anse semanna yírgéngko
Sí:lung léga:pé,péttang léga:pé
Tani: léga:pé,du:téng léga:pé
Mé:tom abíko adgéngko

Do:ng amo:sok
Do:nyi píangém,po:lo loladém
Yonníksula korlennyé
Odokké,lédulo du:té:yé
Abotani:ké aro ayangé
Do:ng amo:sém dukpídnapé

Ngok asin mo:di:so
Arsa:moyé angu mo:píko.+++

NO GÍYÉ ÉMGE:LA:SIN GÍTOMA

---Juwel Pe:gu
 

 Opu-omuné pédo:do
Jupu-jumula judagai asiné
Te:te-re:re:né do:nyido
Unte unte:la dorpagam dagai ayangé

Rago bankampé bandagai
Sí:sang kéréngé

No gíyé émge:la:sin gítoma

Ginmur po:lodok bo:bi-lo:li:né
Ésarí:ngémpé sargo:dagai
Ngai-ngasa:do nénganné ayang ésaré

Di:suppé batpakkang
Todír-toso:la adíé

Anpa:dagai amír arang lambédo
Kangkin lékor kornamko

No gíyé émge:la:sin gítoma.+++

TÉRÉM PO:LO

Rokom tangar pét-ya:sula, kassé bérsa:l ka:dag,

Aín ayyém ri:yet ri:yetla Photo: Brahmananda Patiri

                    -Bhaigeswar Pogag

Térém po:lodé anték tékné

Arík inném  asé:monné,

Ante tékko ara:ngí:dok

Rokom tangar pét-ya:sula 

Kassé bérsa:l ka:dag.

Aín ayyém ri:yet ri:yetla

Oi:séng bulu   po:lumsula

Jé:la ni:tom mola

Arík kangírbodak.

Magbopé idung térém polo:lo

Yamépé idung térém po:lo:lo

Aríg kangírbodung  anu yaméngé

Lotta kangírbodung anu magboé

Éddíko mé:pom boma:bidang

Aséngé térém po:lo:loé.

Sí:sangé kinmang sí:togé kinmang

Mé:po a:dung térém po:lo:lo,

Nébíng bulugo:m kélíng koddag

Kébungété mirém rémdag.

Gohpur régamé raktum légapé

Tangar pésoma:pé arík mo:si:dag

Dagdung mímbíré ni:tom modag

Ni:tom arangído kassé bérsal ka:dag.

Majuli rékamé ansé: sé:dag

Ba:u  amdangém mosi:nggel

Mo:pí arígém iropsa:dag.

Térém  po:lolo ni:tom bariyé

Sí:sang sí:togé mé:po a:dag

Péi péttangété mirém rémdag

Kassésin antég ara:ngídok bérsa:la kadag.

Térém po:lodé anték tékné

Arík inném  asé:monné,

Ante tékko ara:ngí:dok

Rokom tangar pét-ya:sula 

Kassé bérsa:l ka:dag.

Siang Ané No Pínpo:yo

Ané Siang nok agomém pa:dung silo-mélo
No íngkolo gípe mé:dun ngolum me:pakla?
No pínmílo réngamé sékom mé:tinsuyékun?
Siang Ané no ka:ma mílo
Kémoyéku  ngolukké turnam-ga:namé

Siang Ané no pínpo:yo….

Siang Ané no pínpo:yo….

Oi ni:tomé mé:len nanné ka:mayé
Mopin-Solung-Lígang imayé
Sulliyé yupak yépé ngolukké agom-gomlabém
Yogala giyépé Abotani  ommangké dírbi-dírlabé
Kangkin sunan ka:mayé sé mo:píso
Siang Ané no pínpoyo….

Miksi dílagom sikurpéi biddum supé
Sédi Ba:bu-Mélo  Na:né mé kumla pédongkoi  omopé
Ané no ka:ma mílo
Ané Do:nyi ké píangé kémoyékupé
Po:lo abuké loladé rupla du:yar yépé
Siang Ané no pínpo:yo…

Dité-ayíng kinma:pé ngané takam ké
Noggíng turnan bédangé
Gejík-geroné kamponé yumrangé néi-néngan nganma:yépé
Among-arík takamé ya:siné Sahara pé iyépé
Ansín ésardé sarma:yépé
Siang Ané no ngokké appíngé
No ngokké ayangé
No ngokké mé:tin sunamé
Siang Ané no pínpo:yo….