GÍLATTOKUKA

Nom gyaniyé émna

Sé:ko luyé:n?

Gyani ya:mílo

Tani: asiném kinbiyai.

No gyaniyéi?

No porila

Oko ko pa:to:n

Abbugéméi jo:pé émna

Porikan ?

No aro lambéko

Léngkan boyyam

No porila

Réngamém

Ainé agerko

Gerboyamílo

Nom luyyai

Gyanié émna.

Nom Gyanié émna

Mé:ti:nsutagai

Sé mo:písok

Gyan do:yingki

Tani:ém turnané

Aséng ngi:tom ko

Kíboye émna.

Nom réngamé

Asinki toríksutagai

Alakki soriksutagai

Nok pa:p kané asindé

Lamkupé kurratkang.

No tani: ajonmang

Nokké tani: asin kamang.

Nok asin dé ammo kadag.

Tani: asin kayyamílo

Tani: asiném jikiyai.

Tani asin kayyamílo

Sékkai bírméké

Tubtadok

Ya:line pu:t dém

Titpu:ma:yai.

No aropé

Nogom sekkai

Ao:wamílo

Sékkai anéké

A:ng ém ro:yukma:yai.

De:g légapé

ager gerné bírodém

No appetsumayai.

No Bible, kuran

Bhagobot-Gita

Porige:la:sin

Gyaném kupsi:la:tomang.

No piyyang ajéngém,

Lo:rí:ma:né agerém gertíla du:ng.

Nokké supaksin

Ayiré du:ng.

No gílattoku

Ainé bélamko

Léngkanbotoi

Nok réngamsim

Odopak nom luye

Aro tani:é émna.***

Mishing Renaissance is grateful to Mg Bhaigeswar Pogag for the above contribution....

Mising Ethnic Poems

BÍ OKKOM IDUN

- Bhaigeswar Pogag

Bí okkom idun?

Bí ílíngem démdung

Bogibi:l béda:do.

Iyong po:lo do:nyi dogom

Do:nyié guwa:mang

Ésaré sara:mang

Bík amírdo.

Lamku kéra:pé

Gari –Motoré

Duktí:la dung.

Bí agerém angke ke:la

Gertí:la dung .

Kéréng kéré:do

Ísíng ílíngé dung

Émdaggom

Ager gerkoí:dé

Tetko émna mé:poldung.

Bí mé:dung

Ngok ílíng démnamsé

Takam légapé

Yampoké sí:sangé

Asé: sé:la Dibrugor-Démaji

Dilli-Dispurpé

Asé sé:nané.

Bí okkom idun?

Bí ílíngém démdung

Bogibi:l béda:do.

Bí mé:dag

Bogibi:ldé írga: moyé

Kekon kesagém

Ager kaye pési ko:ré

Mising réngamégom

Darsuye Mo:pí loladdo.

Bí sé:kon ?

Bí Mising anéko

Durnam légapé ager gernéko

Opín légapé

Aipé mé:néko.

Bí okkom idun?

Bí ílíngém démdung

Bogibi:l béda:do.

----------------------------------

KINSUNA YUBNANG

- Mg Obhijit Payeng

Kinsuna yubnang

Yubmé ai-pé orí:dung

Abbug bomné gí:godung

Édílo abbug beyesong

Édíko siyésong

Kapésinei lula:mang

So turnam léga:pé

Jinkaraksun dung.

Kinsuna yubnang

Sa:díma:do do:nyi sa:dung

Laddíma:pé po:lo laddung

Sardíma:pé ésaré sardung

Odíma:do pédongé odung.

Édé

Do:nyi dé

Sa:tíd péké

Po:lo:dé

Ladtíd péké

Pédo:dé

Otíd péké

Ésar dé

sartíd péké

Yummém

kinsuna yubnang.

Mishing Renaissance appreciates the contribution by Mg Obhijit Payeng and Bhaigeswar Pogag....

New Year Poems:Mg Abhijit Payeng:Wardha

DO:LU:LO A:YE ALI-AYE-LÍGANGÉ

Gínmur po:lo:lok
A:po:né lígang longéd
Ali-aye-ligangé a:ye
Lutadko lubidung
Gínmur ésaré sarra
Singgi gimuré yinggo:na

Do:lu:lo
Ali-aye-lígangé a:ye
Kamro ékkamko natno:to
Ongo ngosan sanno:to
Yékdin dínno:to

Amli: a:m ko
Yigno:to líggoddopé.
Ampi: ambín íno:to
Purang apin ra:dopé

Gonro ugan, Mibu galuk
Sumno:to
Yakan ege, Ribi gaséng
Sumno:to
Lo:le: so:na:dopé.
Kagori pano:to
Nébír-bírnadopé

Ampi ambínki
Nogjin, Po:ro
Pitno:to
Gu:mín-so:yíngé
Sudbu:péké



Kumde supo:to.
Do:lu:lo
Ali-aye-lígangé a:ye
Lé:no marba:dém
Rabbédokké
Tulen so:na méto.

------------------------------

MÉ:NAMMÉ RÍKSUPÉNAMAI

Mé:nammé ríksupénamai
Ronganoi a:né pígodo.
Ko:li do:li:yé
Do:lung okumdok
Míkkí yínggo sa:dodo.

So:bo menjeg
Go:bom díkudodo
Monbang kaibí
Tu:tog tapung munna
Aríg gílad díkudo.

Kémmo lulu:na
Lídor sa:lí:suna
Ésar pédong
Yolyu:suna sa:na:mín
Mé:nammé ríksuna:tomang
Ronganoi a:né pígodo.

Mishing Renaissance appreciates the contribution of Mg Abhijit Payeng

Mishing Donyi:Mishing Poem by Mg.Abhijit Payeng

Émpag do:yingéméi kípé

Nom émpag do:yingéméi kípé.

Pe:ném mége:na

Abbugém kapina tísa:ton ---

Mé:po-ménganém mége:na

Kapina mé:sékton

Mimag bélamém.

Odo

Ngo-gom aipé mé:dungai

Ésang-édu, ayang-aboém

Émpige:na silo -------

Silo Tani:ém jinmo-ge:na

Ka:níngkan kapina -----

Nom lékoném

Émpag do:yingéméi kípé.

Kapina Tani:ge:na:sin

Tani:ém apkeníngka:n

Mé:po mé:tomém mége:na

Mimag mé:tom adníng ka:n !

Asiné rémagma: pé

Ílí:pé ika:n kapina -----

Ayang amikki kama:pé

Koyemo:na yirma:pé

Me:dírdu:n kapina ----

Ngo:sin mé:dungai

Okum rínggoko

Émpige:na silo ----

Silo kapina mé:sékton

Aték turgo:ém.

No lékoném

Ngok kera:so:pé ginangku

Ang tolígna

Émpag do:yingéméi kípé.

: Mishing Renaissance is thankful to Mg.Abhijit Payeng for the above contribution :