Am gadko arígdo oko kabaném kabduné!

            Bhaskar Pegu

Dité ruyik am gadko arígdo
Oko kabaném kabdun no
O ajona!
Runggok gogyar dung
Nokké kabaném tadla
Aín amésin kabmín dung
Tapyar tapyarra ,otir obirra

Éngun-étamap ka-ngak sul dung
Do:mír tok ka:nam aryi-arsan  do:nyi bísin!
Asin ayang doyingkoya!
Pa:lamanam aipé-mé:namdéya?
Lukíte ngom lékkauko!
Am gadko arígdo oko kabaném kabduné!

Sido am gadkoso
Ngomméi  gogsupa:do
Nok mé:bomsunam kabanau dém
Ngowwéi kabmínpé!
Dagne nokké jé:sar la:manam oi-ni:tomko asin ara:do?
O ajona!
Kíkíte ngom lékkauko!
Am gadko arígdo oko kabaném kabduné!


Déwoi miksém Obonori pé bidmoyobo !
Do:yingém imoyobo Jongki-Panoi pé
Lubipé oi-nok mé:bom sunam atérmé!
Kísar suto gompirokoi nok asin arang mé:namko
Mabipé ngo Sadiya tokké Burolipé!
O ajona!
Am gadko arígdo oko kabaném kabduné!

Nokké Koyémdé

Pi:muk appun punnam dé dekko ma:nyíng kamodag,nokké koyémdésin...

                                    Bhaskar Pegu 

Rígsulídag do nom rígsula:mang

Luposulidag do nom lupo sula:mang

Bojérungko  idagbo nokké agomém pa:ma nammé

Lupé nammé ka:mabo  ngok asin onamsém

Nokké koyémdé abako agomém lubidag

Asi jili  pé imodag ngokké asinang

Yakané mukkang  yípak dag gedopé ka:nam do:mír tok

Pédong pa:la onjalné am pé idag gené arík dok

Kinma ngo okko toyala du:song  bédalo

Rémik-jémik né pe:dongémpin miksi ésong!

Yumdéng ayir émpé asin kémo moyesong!!

Pu:mi asi angkampé ngom lumtid bomyesong!!!