TO:DE: LANG PÍAG KÉ DO:YING.

                                                                                                    - Bhaigeswar Pogag

Do:yi:lok do:yingé.To:dí- yamo do:yingé.Lekelo Agro píakkolang To:de: péttang dornyi:ko dungngai.Kampo émyém To:de:émyang kamponé péttangé amo:so kamangng.Ka:nyingé émyem Píagémyang ka:nyi: péttangé kamang.

Édé do:yi:dé longkolo To:de:ké asindo mé:yar mé:yarra mé:la dungkang.

Longékolo To:de:bí mé:ngkang-amo:sok  bodo:ya:pé tame kané pétta-péyi:nglok ngokképak bodoya:dak.Gényi:ng gésongé.Sémpé bosor-boyorpé éddíko lo:dísém ngo sogobomna yeyya:n?Ngoggong sé amo:so  bosor-boyorné tame:sém jonggobomna dung.Sékai ngok Tame:sém koyyamílo bippai.Bí Pírrik asin mé:ngkampé mé:la mé:ngkesula siyyaboi.Émdaggom bí ungkokosin mé:beksutomang.

Longékolo bí édémpé mé:la du:dom Píakko ka:pa:suto.Odo bí mé:ngkang.Píagbímai aidu:n!bíkké tame:dé ko:tu:ngau:dak.Bégímpé dé:ladag.Amme:sin Píakmé rukmang.Ngok kangkanísi ngokké sinané.Ngom totnésin bojeko dung.

Píagbísin longékolo bím amme: lure:-luse:namém mé:re:sula aíé aipé mé:dírra asin asin bokki  lusukang-“amo:sok appíngéyang ka:nyi:ng ka:sodopé ru:nébísin ngom isimpé ru:pa:mangai. yakaloksin yakké ngomyang yaka-ya:né amo:so kamang.To:de:mé ru:néídé ngomsin ru:tak.Émpige:la ngonyim kapé ru:pansuto:n?”édémpé mé:la du:dom To:de:dé bíkké aníndo:pé dé:ngala gíato.Odo píagdé To:de:mé tauto-“Ajona nok Amíddok asuda:uko bisuyenéi?Nok tam:dém aipé mé:bo:dak.”Odo To:de dé aipé mé:pokang.Odo To:de:dé luto-“Ajona kapila bima:yen,biye.Nokké tame:dém ngom bi odokké ngokké tame:sim nom bipé.”odo Píagbí aipé mé:pokang.Odokké amíddém lang tame:dém bika:mínsuto.

Édémpé bínyi: dumsigém olaimínsuge:la asé:la segongbosukang.To:de:dé Píagdok dumsigém gébomnangkul bíkké réngam ara:dope gía:toku.Píagbísin édémí:pé gía:toku.Odo angu To:de: kídardé bím ajon jonsutokumang.Píagbímgom angu Píakkídardé padubla pato.To:de:mé:té angu To:de: kídardé padubla pato.Píagbí Píakpé itokumang odokké To:de:bísin To:de:pé itokumang.Bínyi:kké dumsígdé angpakkang.Bínyi:kké réngamé katokumang.Ajon-arumé katokumang.Bínyi: odopak mé:sukangku aidaggom aimanggom aíké opíndémyang aiyamang.

Odo bínyi: anyi:dé po:péké dumsigídéi aiyadag émna olaimínsutoku.Édé longédokké binyi:anyi:dé ami:ké gélod-bomlodém mé:botokumang.

Kombong Polo Mé:pala

Kombong po:lo lok ke:dang appun

                                                                    Bhaskar Pegu

Takam loi néyé né nganém kabegdung

nésin-némí é gí:dí sípí ém idung

owa lokké sanggapé siyai yadla ésaré sardung

soyung pakkom nitomém modung...

Hey ajon!Mé:pa ma:ne no dité ruyi lok

rígu moko aríg dém...

sinam-turnam do:ying kínamdém

donyi arkepé kadodo ísí nérído du:ra sunam dém

nok oi-kapdodok péyi-péttang momín namdém

yumdéng ayir do aipé mé:laru:mang

emgel ané síngkol gípansunamdém

...kombong polo no aropé asiném simad modung

Ayir?Silo asin mé:pala sidaggom

édé mé:po-mé:dír ayir dé pa:lad ma:bo

yummi-yummap nokké agomém mé:padung....

PEGU ÉRA:DOK UYING 
-Bhaigeswar Pogag

Tani: amo:ng kolang Ui: amongko dung émna to:dí-ya:mo:lokkébo do:yingé du:ng.Abu Tunturun odokké Mílang ui do:yingém ngolu ta:to-ya:yo buluké nappalok tattung.Silo ngo Uying ui do:yingko kípé mé:dung.

Do:yi:dé sémpé-leke:lo  Karko amo:to du:dokolo Maktél émnam Pegu abuko dungngai.Bík éra:dé édé do:ludok appíngémpak-yang mirém rémya:dagai.Tatnamé buluk okum éra:dok tani: kídardé oko atíko amo:do níklík yeji takamdéi jarpé jarsa:sudagai.Kopak ko  taksémla ledogom onjal jarpé jardagai.Pétu-Peretko piddogom uyu amo:lok atíkonémpé geyom-gesomna jarsudagai.Okumdo dogné-dokpuné abí bítaksula dungngai.Do:nyi amongé, Po:lo amo:ngé angupé dung émna édé abudé mé:ma:ngai.Kapé émyém bíkké pí:rí:-pí:ra:m atí kamangai.Dínsan-ngosané édílo:sin pérabdokké yokmangai.

Do:ludok ami: kídí dokké komsu:lok a:m –ambíné yummém yummélo yokla kéík kéíkpé Uying o:tung émna kinkang.Édémpila Maktélké okumdo:pé  do:lung ami kídaré gíyi:-gísa:mangai odokké do:lung ami: kídaré bím do:ludokké mo:tépé yotpakla lé:tungai.

Maktél bí sé:komsin no:mín-momínsumangai.Bí sékomsin aimapé lumangai.Émdaggom bím do:lung ami: kídaré ajon jonmangai.Bík okum éra:dok ao:-ommangé do:ludok bojeya:pagdagai.Ommang kídarégom do:lung ami: kídardok ajon jonmanamdém annyi:sudungai.Émdaggom buluk asin do:yidém do:lung ami: kídardok tatkolo luséksupé annyi:dungai.Do:lung ami: kídaré buluké unam (o:nam) paruk takla dogung gu:né kídar dokki ajon jonsumangai.Akon annyi ludak buluké ki:pardo yo: kíték do paruk tagdak.Dogung gu:dak.Do:yi:lok do:yi:pé tolo-bolopé lutak-luyakkang.Agom dok agompé tatnono:mané amme: tadamnam dokki Maktél bí  aíém annyi:sukang.Bík Uying kídardokké ao:-Ommangé,nati-putié bojeko ikang.O:la opísulamapé ikang.Édémpila bí mé:to-“Supak Karko amo:ngém mé:pak lagiyebong ”.

Maktél bí okumdok ao:-ommang kídadém  ru:su:to-“Nolu ako akopé Uying kidardok kinma:ngo:pé Pa:m aríkpé gíngapkangka.Ngo appíngém yang lédupé gípé.”Édémpé buluk éradok ami; kídardé ako akopé anupé inam pa:m dopé gíngapkang.Uying kídardé do:ludo gígo gígola okum ami: kídarém mago magola makíramsula bullong okum do dungkang.Yo:wém  okum ru:yidokki tani:é gípatpé pésodak.Do:lung ami kidaré Uying kidardok utpatki du:la daklamapé ikang. Émdaggom atikosin ilamapé ila dungai.Longngémsin gípatpé pésodungai.

Yumékolo buluké okum éra:dok abín magbodé kangkí kumanamé bojeko ikabo émna donam-tí:namko jo:bomna ka:rokapé émna gíto.Lambédo atí atíko idolo dégémlíkla yumélíkkang.Émdaggom bí aginkémpé mé:la asé:ngo:la gípíto.Gípíla “érangé ngo gídung ”émna jé:tatsuto.Odo Uying kídardé gísatok émna goksa:to.Magbodé:gom apong kilíngdém jo:sabomna gísa:to.Gísa:la ka:namé mé:ramdo Uying ao-ommang kídardé akoné akoném ka:tak ka:yak mínsukang.Akondok amigdé akondém ka:yémílo lot lot émpé undak.Okumdok érang ami: kídardémpé orík-boríksukang.Amik kídardok unnamdém ka:ra:su:lama: íjí yallo dépakla magbodé okumdokké kapé sumyi:tokusong bí atíkosin lulasutomang.Uyu amongésong tani: amo:ngésong kinsutokumang.Bí ngamapé do:ludopé dukla daddo:pé érangkolok lottadok kunta ako gomgapsula lékkongko jé:lato.Odo okkan ! émna tani kídardé duklenna ka:namé Pegu érang magbodé émna  lugelam bosa:bomnangkula yaloko gogbilangkula daddo:pé ngasangkangku.Odokké Uying  kídardok  do:yingém bulum kíbito odokké bík ato-ayo kídardok do:yingém tauto.Do:lung ami kídaré bím takam do:yingém lubito.

Édé yumédokké bojeyapé do:lung ami kídaré pésola rokondo do:lungé nu:la okumdok péré yabgo odokké ge:né yabgom rapin-ge:la méru rulíkto.Mérué rulígdagdo Uying kídardé jé:tak-kutakmínsukang.Odokké mérué uying kídardém gukeyamto.

Ngi:tom do:yí:lo édé longédokké Uyingé amo:sokké yokkang émna dungkang.

POETRY FOR PLEASURE:MÉ:TOM GAMIG
                                                  Bhaskar Pegu


Poetry always makes for enlightenment and pleasure.A collection of poems edited by Abhijit Payeng "Mé:tom Gamig"from the banks of Ronganoi is contrasted in between romanticism and nostalgia,call for revolution and social change,the pleasure of spring and Ligang longing.The pages of Mé:tom Gamig are adorn by both budding and well-known poets,all from riverside!After reading the poems,one can sense the power of imagination of the poets.The rural setting by the river Ronganoi is fervently reflected in one the poems written by Nirmal Narah especially when he underscores:Ronganoi ru:yi-rusak lo ngoluk do:lung dung,jirin-jirinpe a:ne asse biyyara biddung;Kekon-kesag pigolo, Si:sa: yame:ye mebo nitomem songkit kikittakna dung...

Mé:tom Gamig

Editor:Abhijit Payeng

Publisher:Ronganoi Prakashan

Mothowkhur Ahomani

Lakhimpur ,Assam-787 052

Price:Rs.70.00

  

Poet Abhijit Payeng paints the stark social reality emerging out of guns and bullets in his poem "Kinsuna Yubnang".He has scripted on Ligang festivals,romanticism as well as facts of the social whole.While Bhaigeswar Pogag's poems are best known for his revolutionary appeal for unity and consciousness to get out the present clumsy atmosphere.One can see in his poem how betrayal and exploitation of Mising society must be dealt with by standing unitedly and firmly.Pogag also calls for writing through his poem "No Attoka" ,which shows the poet's love for one's language and culture.

The poetry is filled with variety of tastes and feelings that gives the reader a pleasure reading.Besides Abhijit and Bhaigeswar,the poets of Me:tom Gamig include Prasanta Payeng,Jiten Payeng,Jiten Narah,Nirmal Narah,Meghoram Payeng and Dipti Padun.There is no doubt that Me:tom Gamig from the Rongonai river bank will left any reader unrewarded.




 

ANDÉN DO:YING:SOBEN LOKKÉ TANIPÉ

-Mg.Bhaigeswar Pogag

Silokolokké takyíng  dítakpo:pé  Lokhimpur mongke:lo Taku do:lungko dungngai.Édé doLu:do Taruk émnam toku ami:ko dungngai.Bíkké ao:-ommang émpé sé:kosin kamangai.Ao-ommang émpé Soben adoro:ko dungngai.

Bí longékolo taonpé émna gito.Odo bédado aipé Iyong po:lodok pékarpé karné do:nyi dok gusi-gunamki ísíng néríngkolo tetrasupé émna Ké:né néríngkolo tetrasuto.Édé ísíng aníndo Iskulko dungngai.Édé iskuldok porainédé ko:-ko:néng kídardém poyirra dungngai.odo ko-ko:néng kídardé Sobennémpé tak-tagaila yirtaksula dungnga:lok poyir abudé aglí:la bulum jírto-é  Soben kídara okkom me:maitakla du:n?nolukémpiné Sobenné ngo íddíko tanipé motosong! Nolum tanipé mope émna ngo éddíko asin díkla porai du:song,noluk asin kídardé mé:ngkinmang.

Taruk bí poyir abudok do:ying appídém tomi:-tomi:la talla dungngai.Odo bí mé:to- ‘O, sé mastor simai ainékon! Bí bojeko  Sobenném tanipé motung émna ludak.Bí:mai ngok Sobenérém tanipé ilayen!’édémpé bí mé:la iskul sutidak me:lampé bí mastordok ukumdopé gia:la  mastordok alédo oala kumna lukang-‘Sara,ngokké amo:so okkosin kamang .Ao-ommang émpé Soben adorongko du:ng.Édém no tanipé mobitéika.Nom íddíko murkongém lagiyeji bipé.

Tarukké agomdém tadge:la mastordé aipé Tarukmé luyirkito,émdagom Tarukmé kapésin luyirla:tomang.Odo mastordé aiye ,ngo nok Sobendém tanipé molaye.Édémpigela ngom dítakko ayirém lagiye odokké murkong  200.00 ko(Língko annyiko) lagiye.

Taruk bí mastordok agomdém tadgela taléng-kítík kinsumapé aséngkang.Bí aséngki  lomna lomna okumpé gítoku odokké Sobendém mastordok ékumdopé sobomna bito.Bí murkong 200.00(Língko annyiko)kosin bito.Mastordé bím dítag me:lampé a:langkuka émna luto odokké Tarukmé urríktoku.Mastordé murkodokki take-talab régela Sobendém ayyompé dopakto.

Tarukbí longngém longngém dítak angordopé émna  saptíbomkang.Longékolo dítagé gíyinkang.Mastordok togésunam longédé píngangkangku.Taruk bí:si:n Mastordopé ali-aye,purang,Tépa-Tangetko bombila  bíkké aman ao dém langkupé émna gíto.

Tarukmé ka:pa:la mastordé péso péso:la  karíksuto. Tarugbí mastordém kumríksuto odokké tauto-‘Sara,ngok Sobendé tanipé ika:bonéi?’odo mastordé luto-‘Ilasin su bí Guwahati amo:bo  king-go migom okumdok bottané migompé iladu:ng.Odo Tarugbí aipé mé:pokang.Bík bombinam aman kídardém mastordém bigela Guwahatipé gito.Guwahatibo bí ga:ng odokké Ni:m annékké bomna gitung.Bí bottan migom okumkolo gíala ka:namé aropé bottané nammur go:goné amiko ka:pala giato.Odo amidé bím tauto-‘No sékom matala giadunga:n?’Odo Tarugbí luto-‘O,É,Sobena aíké malígémsin kangkinsukuman? Nomna gíríksukupé émna gídung.No tani dumsíggém pa:to émpigela Soben nammurdém su:lo:pé métung.Migomdé bím Sobenna émna lunamdém talla bí aipé aglí:la sokidardém lulíkla ager okumdokké ménnenlíktoku.Tarukbí odo aipé aglíla lukang-‘nom sé ga:ng sokki odokké sé Ni:m annésokki o:sa:tagai.Supak tanipé battokuném malígémsin kangkintokumang.Kasulang nom ngo mastordém lulíklangkula Sobenpé imoyeku.No ngom kapé mé:du:n?

            Édémpé togé géla Tarugbí mastordok okumpé gitoku.Odokké mastordém do:ying takamém kíbi:toku.Odo mastordé yampo rokompé murkong lingko annyikoda bomla gílangku émna okumpé urríktoku.Mastordé po:péké Sobendém dopakto émpila anupé Soben adorko régela mébito.

Rokondo Tarukbí aglíngki kortak takla mastordok okumdopé gito.Mastordé murko língko annyi dém latumgela Sobendém bitku.Odo Tarugbí Sobendém démna démna lukang-‘no ngom kapé mé:du:n?nom tanipé motoném botta bottapé mé:su:dagai,supak pa:du:n’ émna démbomkang.Odokké Sobendém dír dír émna ukumpé sobomkangku.